قىز غۇرۇرى
-
توز مەسەللىك بولالمىساڭمۇ،
مەيلى بولغىن شاخلاردا غۇنچە.
ئەدەب-ئەردەم ھەمرايىڭ بولسۇن،
ئۈزۈلمىسۇن رىشتىدىن ئۈنچە.
-
شىجائەتتە ئىپارخاندەك بول،
نومۇسۇڭچۈن ئۆلسەڭمۇ ئۆلگىن.
قىزىم دۇنيا سېنىڭ قولۇڭدا،
ھايا بىلەن قايتا تىرىلگىن.

-
قىزىم، سەن بىر مىللەتنىڭ ئانىسى، كەلگۈسى ئەۋلادلارنىڭ تەربىيىچىسى، سەندىن ئۈمۈد قىلىدىغىنىم ئاددىيلا.
سېنىڭ ۋىجدان-غۇرۇرلۇق بولۇشۇڭنى ئۈمىد قىلىمەن، ئىگىمىزنىڭ ساڭا، ئىپپەت-ھايا، ئېتىقاد، بىلىم، ئەدەپ-ئەخلاق ئاتا قىلىشىنى ھەر ۋاقىت تىلەيمەن!
بىر مىللەتنىڭ قىزلىرى ئەخلاقسىز بولدى دېمەك، مىللەتنىڭ كەلگۈسى ئەۋلادلىرىنى تەربىيەلەش جەھەتتە كەينىگە چېكىندى دېمەكتۇر. كىيىم كىيىشتە ۋە ياكى يۈرۈش-تۇرۇش ھەممە جەھەتلەردە بولسۇن، كىشىلەر ئەخلاق نۇقتىسىدىن ساڭا ھەۋەس قىلغۇدەك ياشا! شۇندىلا بۇ ھاياتتا ياشىغىنىڭنىڭ ھەقىقىي مەنىسىنى تاپىسەن.
قىزىم، سېنى « يەتتە قىزلىرىم، ئىپارخان، نۇزۇگۇم» دەك جاسارەتلىك قىزلىرىمىزنى ئۆزىگە ئۈلگە قىلىپ، ئىرادىلىك، جاسارەتلىك قىز بولۇپ يېتىشىپ چىقسا ئىكەن دەيمەن.
قىزىم، بۇ دۇنيا بىر ئۆتكۈنچى شامالدۇر، ھاياتنىڭ بىردەملىك قىزغىنلىقىغا، گۈزەللىكىگە بېرىلمە! ئىپپەت-ھايانى جېنىڭدىن ئەزىز بىلگىن. ئىپپەت-ھايانى يوقاتقان كىشىدە ئىمانمۇ، مېھرى-مۇھەببەتمۇ بولمايدۇ. بۇنداق ئىنساننىڭ ھايۋاندىن پەرقى يوق. بىلگىنكى، سەن ئىپپەت-ھايا ئاچقۇچۇڭدىن ئايرىلغان كۈنۈڭ، سېنىڭ تىرىك تۇرۇپ ئۆلگەن كۈنۈڭدۇر.
قىزىم، سېنىڭ پاك قەلب، گۈزەل روھقا ئىگە بىر قىز بولۇپ چىقىشىڭنى ئۈمىد قىلىمەن!